Tag Archives: మిల్లర్లు

బియ్యం ఎగుమతుల కోసం.. మిల్లర్ల లాబీయింగ్ తీవ్రం


హైదరాబాద్, జూన్ 8: బియ్యాన్ని విదేశాలకు ఎగుమతి చేసేందుకు అనుమతించాలంటూ మిల్లర్లు కేంద్రంపై లాబీయింగ్ తీవ్రం చేశారు. ఇదే జరిగితే రాష్ట్రంలో బియ్యం ధరలు చుక్కలనంటుతాయని మార్కెట్ నిపుణులు హెచ్చరిస్తున్నారు. రాష్ట్రంలో ఈ ఏడాది ఎప్పుడూ లేనంత ధాన్యం దిగుబడి వచ్చింది. దీంతో ప్రభుత్వం రంగంలోకి దిగి.. ఐకేపీ కేంద్రాలు, ఎఫ్‌సీఐ, పౌరసరఫరాలశాఖ ద్వారా కనీస మద్దతుధరకు ధాన్యాన్ని కొనుగోలు చేసింది. ఫలితంగా మిల్లర్లు కూడా ధాన్యాన్ని కనీస మద్దతు ధరకు కొనాల్సి వచ్చింది.

ఉభయ గోదావరి, నల్లగొండ, కరీంనగర్, నెల్లూరు జిల్లాల్లో కొంత మంది రైతుల నుంచి ఏవన్ రకం (మసూరీ) ధాన్యాన్ని మద్దతు ధరకన్నా ఎక్కువే చెల్లించి తాము కొన్నామని మిల్లర్లు చెబుతున్నారు. అందువల్ల సన్నబియ్యాన్ని ఎగుమతి చేసుకోవటానికి అనుమతివ్వాలని వీరు పైరవీ చేస్తున్నారు. గతంలో రోశయ్య ప్రభుత్వంపై గుంటూరు జిల్లాకు చెందిన ఓ ప్రజాప్రతినిధి ద్వారా మిల్లర్లు ఈ దిశగా ఒత్తిడి తెచ్చారు. ఇప్పుడు కూడా ఆ నేత ద్వారానే ప్రయత్నాలు చేస్తున్నట్లు సమాచారం. కరీంనగర్ జిల్లాకు చెందిన మిల్లర్లు మాట్లాడుతూ.. ప్రతి మిల్లర్ వద్ద 23 -26 వేల క్వింటాళ్ల వరకు బియ్యం నిల్వలున్నాయని తెలిపారు.

ఇలాంటి పరిస్థితుల్లో.. బియ్యాన్ని విదేశాలకు ఎగుమతి చేసుకొనేలా తమకు అవకాశం కల్పిస్తే.. రైతులకు, ఐకేపీ గ్రూపులకు మేలు జరుగుతుందని చెబుతున్నారు. తూర్పుగోదావరి జిల్లాకు చెందిన ఓ మిల్లర్ మాట్లాడుతూ.. “విదేశాలకు మేం ఎగుమతి చేసేది సన్నబియ్యాన్ని మాత్రమే. పౌరసరఫరాల శాఖ గానీ, పేదలు గానీ దొడ్డు బియ్యమే కొంటారు. అలాంటప్పుడు సన్నబియ్యం ఎగుమతులకు అనుమతిస్తే తప్పేంటి?” అన్నారు. అయితే.. దేశంలో ఇటీవల 70% ప్రజలు సన్న బియ్యాన్నే తింటున్నారు. ఇది ఎగుమతి కావడం సహేతుకం కాదంటున్నారు. ఇటీవల రాష్ట్ర పర్యటనకు వచ్చిన కేంద్రమంత్రి థామస్ కూడా ఎగుమతుల పట్ల విముఖత చూపిన విషయాన్ని నిపుణులు గుర్తుచేస్తున్నారు.

https://www.andhrajyothy.com/mainnewsshow.asp?qry=2011/jun/9/main/9main30&more=2011/jun/9/main/main&date=6/9/2011